Category: WARKA MAANTA

Maraykanka  oo Sheegay Inay Diyaar U Yihiin Taageero Ay Siiyaan Soomaaliya dhinaca Milatariga

Waaxda Gaashaanigga Maraykanka (The Pentagon) ayaa ku dhawaaqay inay kordhin doonaan taageeradda ay siiyaan DFS, haddii ay ka soo codsadaan arrintaasi.

Hadalkaasi ayaa soo baxay kadib, qaraxii dhawaan ka dhacay Muqdisho oo ay ku geeriyoodeen in ka badan 300 oo qof.

“Waan u diyaar garownay  inaan taageerno DFS, isla marka ay naga codsadaan” ayuu yiri Afhayeenka Pantagonka. Oo intaasi ku daray inay qorsheynayaan waxa ay ku taageeri karaan DFS.

Milliteriga Maraykanka waxaa Somalia ka jooga 400-Askari, kuwaasi oo Tababar, La-talin,Hawlgelin iyo Taageero Loojistiko ah siiyaan Ciiddanka DFS ee dagaalka kula jira Alshabaab.

Hadalka ka soo baxay Waaxda Gaashaandhiga Maraykanka ayaa ku soo beegmay iyadoo uu Aqalka Cad ee looga arrimiyo dalkaasi shaaciyey in qaar ka mdi ah Muwaadiniintooda ka mid ahaayeen dadkii ku geeriyooday Qarixii vilowga Isbuucan ka dhacay Isgoyska KM 5 ee magaalladdan Muqdisho.


Source: Dayniile

Al-Shabaab oo isku fidiyey Somaliland ka dib markii ay La Wareegeen Magaalada Laas qorey ee  Gobolka Sanaag

Wararka laga heleyo Magaalada laas qoray ee gobolka Sanaag ayaa waxa ay sheegayaan in xalay Ciidamo ka tirsan Al-Shabaab ay galeen Gudaha Magaaladaas.

Magaalada laas qoray oo ah Magaalo Xeeb leh la sheegay in Ciidamo ka tirsan Shabaab oo ka yimid Buuraha Galgala ay tageen kuwaas oo Goob fagaaro ah Bulshafa Magaalada ugu khudbeeyay.

Dadka deegaanka qaarkood ayaa waxa ay sheegeen in Al-Shabaab ay Saacado kooban joogeen halkaas kadibna ay dib uga laabteen.

Masuuliyiinta Maamulka Magaalada laas qoray ee Puntland weli kama hadlin tegi taanka Al-Shabaab ee Magaalada laas qoray.


Source: Dayniile

Banaanbax looga soo horjeedo Xasuuqii Muqdisho oo ka socda Kismaayo

 Banaanbax looga soo horjeedo Qaraxii lagu Xasuuqay Dadka Shacabka ah ee ka dhacay Sabtidii la soo dhaafay Isgoyska Zoobe ee Magaalada Muqdisho islamarkaana loogu duceynayo Dadkii dhintay iyo kuwa Dhaawaca ah ayaa hadda ka bilowday Magaalada Kismaayo Ee Xarunta Gobolka Jubbada Hoose.

Boqolaal Shacab ah ayaa isugu soo baxay Wadooyinka waaweyn ee Magaalada Kismaayo,waxaana lagu wadaa in Madaxweynaha Jubbaland Axmed Madoobe iyo Mas’uuliyiin ka tirsan Jubbaland ay ka qeyb galaan oo ay Qudbad ka jeediyaan.

Waxaa sidoo kale la xiray Goobaha Ganacsiga iyo Iskuulada,iyadoo dadku ay yihiin kuwo dareenkooda ka muujinaya Falkii Foosha Xumaa ee ka dhacay Magaalada Muqdisho.


Source: Dayniile

Maraykanka oo cambaareeyay doorasha Venezuela

VenezuelaLahaanshaha sawirkaAFP

Dawladda Maraykanka ayaa cambaaraysay doorashadii Axaddii ka dhacday Venezuela ee lagu soo dooranayay Barasaabyada, iyaga oo ku ku suntay mid “aan xor iyo xalaal toona ahayn”.

Wasaaradda Arrimaha dibadda ee Maraykanka ayaa sheegtay in wax isdabomarin ay ka jirtay waraaqaha coddaynta, xarrumo codaynna meelo kale loo wareejiyay iyadoo aan shacabka lagu sii war galinin.

“Waan cambaaraynaynaa doorashadii aan xor iyo xalaasha ahayn ee ka dhacday Venezuela. Lama dhagaysanin codka reer Venezuela”, ayay tiri Heather Nauert oo ah afhayeen u hadashay wasaaradda arrimaha dibadda ee Maraykanka.

Taageerayaasha madaxweyne Maduro ayaa ku guulaystay 17 kursi oo ka mid ah 23kii barasaab ee gobolada laga soo doonanayay, laakiin hogaamiyeyaasha mucaaradku waxay ku eedeeyeen wax isdabomarin.

Madaxweyne Nicolás Maduro ayaa sheegay in hannaanka doorashada Venezuela uu yahay Madaxweyne Nicolás Maduro ayaa sheegay in hannaanka doorashada Venezuela uu yahay “midka ugu wanaagsan adduunka”Xulafada Mucaaradka ee DUR ayaana diiday in ay aqbalaan natiijada doorashada.

Madaxweyne Nicolas Maduro ayaa ammaanay guusha u soo hoyatay chavismo, oraahdaas oo ah astaan xisbigiisa loo yaqaanno oo uu bixiyay madaxweynihii hore ee dalka Venezuela, Hugo Chavez.


Source: Dayniile

Dowlada  oo Hakisay Ilaa Amar Dambe Gaadiidka Xamuulka ee Dekedda Ka Shaqeeya

Xukuumadda Federaalka Soomaliya ayaa hakisay ilaa amar dambe inay dibadda usoo baxaan gaadiidka xamuulka ee ka shaqeeya Dekadda Magaaladda Muqdisho.

Wasiirka Wasaaradda Dekedaha iyo Gaadiidka Badda Xukuumadda Federaalka Soomaliya Maryan Aweys Jaamac ayaa soo saartay amar lagu hakinayo gaadiidka xamuulka ee ka shaqeeya Dekedda Muqdisho.

Waxa ay sheegtay madaama lagu mashquulsan yahay gurmadka lagu samata bixinayo dadkii ku dhaawacmay qaraxii ka dhacay Sabtidii Isgoyska Zoobe, aysan macquul aheyn in gaadiidka waa weyn ay isticmaalaan wadooyinka Magaladda Muqdisho.

“Waxaa hakinay gaadiidka waa weyn ee Dekeda Magaaladda Muqdisho xamuulka ka qaaday, si aanay u dhicin mashquul ku yimaada waddooyinka, inta ay socdaan howlaha gurmadka”ayay tiri Wasiirka Dekedaha iyo Gaadiidka Badda.

Sidoo kale waxaa socda qorshayaal lagu mamnuucayo gaadiidka xamuulka inay maalintii isticmaalaan waddooyinka Magaaladda Muqdisho sida ay sheegtay wasiirka.

Shacabka Magaalada Muqdisho ayaa dhibaatooyin badan ku qaba Gaadiidka Xamuulka qaada ee kasoo baxa Dekadda xiliyadda ay dhibaatooyinka ay dhacaan


Source: Dayniile

Madaxweynaha Uganda Oo Cambaareeyey Qarixii Dhawaan Ka Dhacay Muqdisho

Madaxweyne Yoweri Museveni oo ay Ciiddamo ka joogaan Somalia waxa uu si kulul u cambaareeyey qaraxasi, oo ay ku geeriyoodeen in ka badan 300 oo qof.

“Uganda waxay si kulul u cambaaraynaysaa weerarkii waxuushnimada ee ka dhacay Muqdisho, kaasi oo galaaftay nolosha boqolaal qof” ayuu yiri Madaxweyne Museveni.

Qoraal uu soo dhigay Bartiisa Twitter-ka ayaa waxa uu Tacsi u diray Qoysaska ay dadka kaga geeriyoodeen Qaraxaasi.
Dhinaca kale, Uganda waxaa Somalia ka jooga Kumanaan Askari Ugandese oo qeyb ka ah Hawlgalka AMISO


Source: Dayniile

Masar oo lagu xiray 20 Soomaali ah

Soomaalida xabsiga la dhigay oo tiradooda ay gaareyso 20 Qof ayaa waxaa laga qab qabtay xaafad ku taalla degmada Nasri City oo ah meel si weyn Soomaalida ay u degan yihiin.

Sida ay xaqiijiyeen jaaliyadda Soomaalida ah ee ku nool magaalada Qaahira Ciidamada amniga oo aad u hubeysan ayaa gudaha u galay Maqaaxida Soomaalida iyaga oo dadka weydiinayay sharciyada ay ku joogaan dalkaasi.

Dadka la xir xiray oo isugu jira Arday iyo Qaxooti ayaa waxaa loo gudbiyay saldhig ku yaalla degmada Nasri City, si loo hubiyo in ay yihiin dad sharci ku jooga dalka Masar.

Dhinaca kale Ciidamada amniga ayaa sii daayay 14 ka mid ah dadka la qab qabtay, kadib markii Eheladooda ay u keeneen Baasabooradooda iyo Kaararka Qaxootiga oo ay ku joogaan dalkaasi.

“Walaal Soomaalida la qab qabtay tiradooda waa 20 waxay isugu jiraan Arday iyo Qaxooti, Ciidamada geesaha ayay ka soo galeen, kadib waxay wateen dadkii, balse markii dambe waxay soo daayeen 14 ka mid ah oo sharciyadooda wata.” Ayuu yiri Maxamed Cabaas oo ka mid ah Soomaalida ku nool dalkaasi.

Bilihii ugu dambeeyay Dowladda Masar ayaa bilowday in ay xabsiyada dhigto ajaanibta dalkeeda ku sugan ee aanan heysan deganaanshaha dalkaasi.


Source: Dayniile

Ururka Daacish oo gebi ahaanba laga qabsaday Magaalada Raqa ee Dalka Suuriya

raqa

Xoogagga uu Mareykanka taageero ee ciidamada dimuquraadiga ee Suuriya ayaa sheegaya in haatan gebi ahaanba la wareegeen magaalada Raqa oo xarun u ahaan jirtay kooxda la baxday Dowladda Islaamka.

Gudaha magaalada ayaa la sheegayaa in ay ku hareen tiro yar oo ka tirsan mintidiinta kooxdani, gaar ahaanna meel u dhow cusbitalka guud iyo garoonka kubadda cagta ee Raqa.

Dagaal ayaa laga soo warramayaa in uu haatan istaagay waxaana ciidamada dimuquraadiga ee Suuriya sheegayaan in ay la wareegeen fagaaraha Naciim ee hadda ka hor kooxda dowladda Islaamka ay meel fagaare ah dad ku dishay.

Ciidamada qabsaday magaalada ayaa la filayaa in maalmaha soo socda ay shaaciyaan in rasmiyan ay la wareegeen magaaladaasi.

In kabadan 3000 oo qof oo rayid ah ayaa dhawaan isaga qaxay magaalada Raqa.

Maalintii sabtida ahayd ayaa 100 ka tirsan mintidiinta Daacish waxaa loo ogolaaday in ay magaalada isaga baxaan iyaga iyo qoysaskooda balse waxaan ilaa haatan la ogayn halka ay jaan iyo cirib dhigeen dagaalyahannadii kooxdan ee ajaaniibta ahaa.


Source: Dayniile

Dowladda Qatar oo Sheegtay in Soomaaliya Laga Aargoosanayo!!

Wasiirka Arrimaha Dibadda Qatar  Sheekh Mohammed bin Abdulrahman Al-Thani ayaa si cad u sheegay in dowladihii xiriirka u jaray Dowladda Qatar in ay ka aargoosanayaan Soomaliya kadib qaraxii lagu dhamaaday ee ka dhacay magaalada Muqdisho.

Wasiirka oo wareysi dhinacyo badan taabanaya siiyay Wargeyska Al-Sharq ee laga leeyahay dalka Qatar ayuu ku sheegay Soomaaliya in ay ka aargoosanayaan dowladaha Qatar go’doomiyay sababo ku aaddan in ay ka biyo diidday inay u dheg raariciso go’aankooda.

Waxa uu sheegay in dowladahaasi ay wada laalleen kaalmooyinkii aaddannimo ee ay ugu yabooheen Soomaaliya, isagoo xusay in qaar ka mid ah siyaasiyiinta Soomaalida la wada laaluushay, waxaase uu qiray in Xukuumadda Federaalka Soomaaliya ay weli ku adkaysanayso mowqifkeeda.

Hadalkan ayaa ku soo beegmaya laba cisho kadib markii Muqdisho ay ruxeen qaraxii ugu khasaaraha badnaa oo loo adeegsaday gaari xamuul ah uu ka dhacay Isgoyska Zope, KM5 , Degmada Wadajir ee Muqdisho, kaasi oo sababay geerida 276 ruux.

Dowladda Soomaliya ayaa go’aan dhex-dhaxaadnimo ah ka qaadatay khilaafka Wadamada Khaliijka carabta, waxayna cadaadis ay kala kulantay Dowladaha Sacuudiga iyo Imaaraadka Carabta oo doonayay in ay xiriirka u jarto Dowladda Qatar.

Illaa iyo hadda ma jirto koox sheegatay mas’uuliyadda weerarka qarax ee Zope oo lagu sheegay kii ugu khasaaraha badnaa ee Soomaaliya ka dhaca abid.


Source: Dayniile

Mareykanka oo war ka soo saaray Qaraxii Zoobe

Dowladda Mareykanka ayaa markii ugu horeysay waxa ay ka hadashay Qaraxii lagu dhammaaday ee 14-kii October ka dhacay Isgoyska Zoobe ee magaalada Muqdisho.

War qoraal ah oo ka soo baxay Aqalka Cad ee Mareykanka ayaa waxaa lagu sheegay in Dowladda Mareykanka ay si kulul u cambaareyneyso Qaraxii Zoobe, waxayna ku tilmaamtay weerarkaasi in uu ahaa mid bahalnimo ah.

Mareykanka ayaa sheegay ujeedada weerarkaasi in aanu aheyn in la beegsado shaqsiyaadka ku jira Dowladda, balse halkaasi lagu laayay dad shacab ah oo ay ku jiraan Dumar iyo Caruur.

Sidoo kale war ka soo baxay Mareykanka waxaa lagu sheegay Qaraxaasi in ay ku dhinteen Muwaadiniin u dhalatay dalka Mareykanka, kuwaasi oo Soomaaliya u joogay shaqooyin kala duwan.

Dowladda Soomaaliya ayaa sheegtay Qaraxii Zoobe in ay ku dhinteen 276 qof, halka 300 oo kale ay ku dhaawacmeen, waxaana weli sii kordhaya khasaaraha ka dhashay qaraxan, oo lagu tilmaamay in uu ahaa mid Musiibo Qaran ah.

Dhanka kale Taalada magaalada Paris ee wadanka Faransiiska ayaa xalay saqdii dhexe leerkeeda la damiyay si loogu baroordiiqo dadkii lagu xasuuqay weerarkii Muqdisho.


Source: Dayniile